1Jo 3 | PltULB | STEP | Indro toy ny inona ny fitiavana nomen’ny Ray antsika, mba hiantsoana antsika hoe zanak’Andriamanitra, ary izany isika. Noho izany antony izany, izao tontolo izao dia tsy mahafantatra antsika, satria tsy mahafantatra azy izany. [Fanamarihana: Ny dikan-teny taloha dia tsy manisy hoe:”ary izany isika.”]

1 John 3

1 Indro toy ny inona ny fitiavana nomen’ny Ray antsika, mba hiantsoana antsika hoe zanak’Andriamanitra, ary izany isika. Noho izany antony izany, izao tontolo izao dia tsy mahafantatra antsika, satria tsy mahafantatra azy izany. [Fanamarihana: Ny dikan-teny taloha dia tsy manisy hoe:”ary izany isika.”] 2 Ry malala, zanak’Andriamanitra isika ankehitriny, ary izany dia mbola tsy nambara hoe ho toy ny inona isika. Isika dia mahafantatra fa rehefa miseho i Kristy, dia ho tahaka Azy isika, satria hahita Azy toa Azy isika. 3 Ny rehetra izay manana izany fahatokisana momba ny ho avy mifototra aminy izany dia manadio ny tenany mba hadio tahaka Azy.

4 Izay rehetra manota dia manao izay tsy ara-dalàna; fa ny fahotana dia tsy ara-dalàna. 5 Ianareo dia mahafantatra fa i Kristy dia nambara mba hanala ireo fahotana, ary ao aminy dia tsy misy fahotana. 6 Tsy misy olona izay mitoetra ao aminy ka mbola hanota hatrany. Tsy misy olona mbola manota nahita azy na nahafantatra azy.

7 Ry zanaka malala, aza avela hisy olona hamitaka anareo. Ilay iray izay manao ny fahamarinana dia marina, tahaka ny mahamarina an’i Kristy. 8 Ilay iray izay manota dia avy amin’ny devoly, fa ny devoly dia nanota hatrany am-piandohana. Noho izany antony izany ny Zanak’Andriamanitra dia naseho, mba hahafahany mamotika ireo asan’ny devoly.

9 Na iza na iza naterak’Andriamanitra dia tsy hanohy ny fahotana satria ny voa avy tamin’Andriamanitra dia mitoetra ao aminy. Tsy afaka manohy ny fahotana izy satria naterak’Andriamanitra. 10 Ao amin’izany no hampisehoana ireo zanak’Andriamanitra sy ireo zanaky ny devoly. Na iza na iza tsy manao ny marina dia tsy avy amin’Andriamanitra; na ny iray izay tsy tia ny rahalahiny ihany koa aza.

11 Fa izany no hafatra izay efa renareo hatrany am-piandohana: fa isika dia tokony mifankatia, 12 fa tsy toa an’i Kaina, izay avy amin’ilay ratsy sy namono ny rahalahiny. Fa nahoana izy no namono azy? Satria ireo asany dia ratsy, ary ny an’ny rahalahiny dia marina.

13 Aza gaga, ry rahalahiko, raha mankahala anareo ny tany. 14 Fantatsika fa efa niala tamin’ny fahafatesana mankany amin’ny fiainana isika, satria tia an’ireo rahalahy isika. Izay tsy tia dia mitoetra any amin’ny fahafatesana. 15 Izay mankahala ny rahalahiny dia mpamono olona. Fantatrareo fa tsy misy mpamono olona manana fiainana mandrakizay mitoetra ao aminy.

16 Amin’izany no hahafantarantsika ny fitiavana, satria Kristy nanolotra ny ainy ho antsika. Isika ihany koa dia tokony manolotra ny aintsika ho an’ireo rahalahy. 17 Fa na iza na iza manana ny haren’izao tontolo izao, ka mahita ny fahasahiranan’ny rahalahiny, ary manakatona ny fon’ny fangorahany azy, amin’ny fomba ahoana no itoeran’ny fitiavan’Andriamanitra ao aminy? 18 Ry zanako malalako, aoka isika tsy hitia amin’ny teny na koa amin’ny vava, fa amin’ny asa sy fahamarinana.

19 Avy amin’izany no hahafantarantsika fa avy amin’ny fahamarinana isika, ary mampatoky ny fontsika eo anatrehany isika. 20 Fa raha manameloka antsika ny fontsika, Andriamanitra dia lehibe noho ny fontsika, ary mahafantatra ny zava-drehetra Izy. 21 Ry malala, raha tsy manameloka antsika ny fontsika, dia manana fahatokisana amin’Andriamanitra isika. 22 Na inona na inona angatahintsika dia ho azontsika avy aminy, satria isika mitandrina ireo didiny sy manao izay ankasitrahana eo anatrehany.

23 Izao no didiny: tokony mino ny anaran’ny Zanany Jesosy Kristy ary mifankatia isika, tahaka ny efa nanomezany antsika izany didy izany. Ny iray izay mitazona ireo didin’Andriamanitra dia mitoetra ao aminy, ary Andriamanitra mitoetra ao aminy. Amin’izany no hahafantarantsika fa izy dia mitoetra ao amintsika, amin’ny Fanahy izay nomeny antsika.